إلى إسلام عبدالخالق
غور في داهية .. بس طلع قلبي من شنطتك
-1- خلاص نويت
تخلى ببساط الريح
وتشبك الأحلام في ديل الطيارات
و تخلي عز القرب بعد
و تخلي عز الفرح بحر
تزرعه بأيدك ما بينا
و تجادلنا
أن كل ما بينا باقي
وانت باقي
وان كل بعيد مسيره للتلاقي
وأن .. وأن
وناسي أن
البحر لما بينزرع ما بينحصدش
وأن جرح البعد لما بينفتح
ما بينقفلش
وأنك أنت في الأساس
اللي بأيديك
في عنينا شلت الفرح
و عيب في حق الكرم
لما بأيديك تيجي و تاخد الفرح
البحر بينا عريض في عرض الجرح
البحر بينا تمام أحمر بلون الجرح
البحر بينا غوييييييط .. في غوط الجرح
البحر بينا خطر
أخطر من الدمعة اللي بتدغشش عيونك وانت سايق للمطار
وأخطر من الوطن اللي باع حلمك
و زقك عـ السفر
-2-
استنى لحظة
زي ما أنت بضحكتك
زي ما أنت بلفتتك ليا
و صوابعك وأنت بتمثلي شكل البيض
وبترمي آخر أفيهاتك عـ الحياة
لحظة واحدة
نفسي أعبي عينيك في صورة ما تنمحي
نفسي أنحتك تمثال و احطك في المعابد
نفسي أرسمك صورة على جدار الكنايس
نفسي أقصقص حتة من أترك
وادفنها في الجامع
وأشيدلك مقام
نفسي أسلط فوق مقامك نور
و أسوره بسور
وتوب أخضر
و الناس تيجيه وتزور
ونزور معاهم و نندر
ندر غالي للغريب
لـ يعود
نفسي أحطك صفحة أولى في الجرايد
و أدعي أنك إمام الوقت
خِضر وبان لنا
و أجيك مخرم سفينتي و باني ألف جدار
لاجل أن ما أنال الوصل ضلاية فـ جناينك
و ألزم العتبات مُريد
ياه ياللي ناوي تسيبني وتنوّر بعيد
لو كنت يوم أبدأ كلامي
بذكر سيدنا المصطفى
وانشد حكليتك
للصحاب المجدولين لبلاب على وشوش القهاوي
و الجناين
و المدرَّج
كنت و الله ما أقول
أن النهاية تكون فراق
-3-
و عرفت أزاي
يتبلّ القلب حنين
من غير أسباب
و أزاي توحشني لحد ما أكون
على وش جنون
و اتجن
لما أتصور لحظة
أن العنوان المتمسمر في قلوبنا سنين
مش هيودي لبيتك
وأن النمرة المحطوطة فـ تليفونا على الهوت كي
مش هتودي لصوتك
وأن الجرسون في النادي
مش هيستغرب جدا
ما تفكر حبة و تطلب "سانتانا"
و انك ما بقيتش معانا
و أن أحنا بقينا صحاب ناقص واحد
وكمان كام يوم
راح نصبح ناقص اتنين
وكما كام يوم ... و كمان ..
و ما عادش أمان
في القلب الواحد يركن همّه عليه
لما سخافة الدنيا تمرر و تزيد
هتغيب
و تقفـّل بابك و فـ ديلك
هيفارق كل عزيز
كل الأصحاب
كل الأحباب
كل الأيام الحلوة تفارق
و تغيب
و أنا عارف أنك
مش أول واحد فارق
و عذابي أني هأعيش
و الجرح فـ قلبي بيحلف ألف يمين
أنك مش آخر واحد
هناك تعليقان (٢):
جامده جدا القصيده ديه
أقل حاجة عندي
إرسال تعليق