٣١‏/٠٧‏/٢٠٠٨

نص فارس عـ الشط البعيد - يناير 2008 - قصيدة عامية

زارعة مابينا البحر و الصحرا

و مستنية فارس يخطفك من قصرك المرصود

و أنا كنت جايلك .. صدقيني

بس مالقيتش الحصان الابيض

*

الشط برزخ قديم

لو يوم يعدي الموج

الرمل ما يعديش

وإن يوم ينادي الموج

الرمل ما يلبيش

و إن يوم يفور الموج ، يقلع و ما يخليش

إلا الرمال عـ الشط مبلولة بعَتـَب

الشط برزخ خطر

حطه اللي بََدَع السفر

حطه ما بين البين .. و تاه

وأنا اللي واقف عـ الشطوط البعيدة

بألم توبي لا ينشبك في الموج

و تحت نعلي بواقي طرح البحر

أوقات يعن الوجع

و أدور ألملم بواقي عضم الحيتان

اللي حدفها الموج و غرقت عـ الشطوط

و أنا باشاهد جدع

- من الجدعان -

الرمل كـَل سيفه ، و سكته بتنتهي

خده فـ خد الموج على أعتابك

ياه ياللي قافلة في الوشوش بابك

ياما في الصحاري بحور

وياما حبك خطر

و أنا مش جبان .. صدقيني

أنا بس عندي نظر

*

ما عادبي غير النظر يقدر يعديلك

وما في الجراب غير بعض عضم الحيتان تذكار

أنـَّا بنقدر ناخد مـ البحور .. زي ما بتاخد

حتى الحصان الابيض

السحر منه بطل

من أكل شوك الصحاري و شرب ملح البحر

فماتدبحيش بالعينين

و ما تعتبيش عجزي

كفاية أني وصلت نص الطريق

و فـ قلبي منك وجع

*

لو كنتي يوم تغلطي و تواربي شباكك

كنتي لمحتي ضلك المرسوم على الشط البعيد

فارس حصانه شت

مأسور فـ برزخ خطر

ما بين صحاري التوه و بحرك

و فرجه من نظرتك

يمكن ساعتها يحز فيكي الشوق

و يشق ديل فستانك المنقوش طريق

مابين جبال الموج

يمكن ساعتها تحدفي شعرك جديلة

يمكن إذا خطفك ملاك النوم

يزرع حنين الحلم فـ كتافك

جناح

*

لكن رصود قصرك

و الجن في المرايات

و عيون تمام حسنك

بيخافوا يود البحر ينفش شعرك المحلول

فتتنها الشبابيك مغمية

و تتنها عينيكي بين سرحة المرايات

تزرع ما بينا البحر و الصحرا

و تحلم بفارس يخطفك من قصرك المرصود

وأنا .. نص فارس عـ الشط البعيد منتظر

ألقى الحصان الابيض

وكل أملي أني أرجع

اللي أنا مشيته

هناك تعليق واحد:

أحمد سلامــة يقول...

:(
انا مش فاكر كنت كاتب عليها ايه زمان
بس هي اجمل حاجة عامي بحب اقراها من وقت للتاني في الشعر اللي قابلني
وكانت اجمل حاجة في الكتاب بتاع المدونات
انت عملت ايه في المدونة يا عم ؟؟؟؟!!!