ساعات بانسى أن قلبي حزين
و بانزل شبرا أتمشى
وازق ملامحي وسط الزحمة والدكاكين
ما بين شيكولاني والراعي
و شد البياعين في كتفتي و دراعي ...
- "معانا كل شئ ينباع"
- معاك فرحة ؟
- "ده ما تلاقيهوش"
- معاك فرحة ؟
- "يا دوبك لسة خلصانة"
- معاك فرحة ؟
- "مقاسك كام ؟"
سؤال بيخض جسمي خض
فاحس البرد ناشع فـ العضام ما تركش ولا حتة
و ألاقي الحزن زي فيران ترابنا مقرقض الجتة
فـ أضم أكفاني وسط الزحمة و الشارع
و اتسحّب على قبري
ساعات بانسى أن أنا عيل
واروح و اوعد عينيها بأن أنا ليها
فتتبسم .. و توعدني أنها ليّا
- هاشوفك تاني .. توعدني ؟
- أكيد طبعا
- أشوفك فين ؟
- هنا برضه
- وأمتى ؟
- بعد أول فجر
ونظبط في الساعات بينّا
سنة و اتنين نقع ما نبان
ما بين ورقة نتيجة و صفحة فـ أجندة ...
" تاريخ أول صباح الخير"
" تاريخ أول (باحبك) تغلب الشفة "
" تاريخ أول غرق فـ بحور مشاكلنا "
" تاريخ ...
ذكرى وفاة الحب و المواعيد "
ساعات بانسى أن أنا شاعر
و باحلم بالحياة والبيت
و جنة أدخلها بعد ما أموت
بحج ، وصوم
و سطر ذكاة
و بطيخة طيابة
و كيس رضا بالفول
أحط حمولي فوق طرابيزة السفرة
و رجليا فـ مية بملح تغسلهملي حور العين
ألاقي حديث نبينا المصطفى بيقوللي
" رايح فين ؟! ..
يا شاعر
خد حمولك لا المعاد هيفوت
أميركم (أمرؤ القيس ) اللوا بأيده
بيحدي اللي أتولد شاعر
لأسفل وادي فـ جهنم "
ليست هناك تعليقات:
إرسال تعليق